دموعى عايزة تنزل بس رافضة
ضعفى عايز يظهر بس خايف
قلبى موجوع وعايز يتكلم بس مش عارف
جسدى مرهق وعايز يستريح بس مش قادر
...
...
...
حسيت انى عايز اكتب الكلام ده نفسى ارجع طفل تانى مش شايل اى مسئولية ومش شايف اى حاجة فى الدنيا غير انه عايز يلعب
بس عايز اما ارجع طفل تانى الاقى حضن يحتوينى استخبى فى حضن ابويا وامى اما اخاف الاقى حد يشجعنى ويقوينى انا خايف قوى
...
...
...
الدنيا لو جارحة لونها لون فرحة ما هو ايه بيطول عمر الواحد غير الفرحة
...
...
...
انا اعترف انى شخص اعتمادى اعتمدت على كل اللى حوالية علشان يحلولى مشاكلى علشان كدة باواجه الازمة اللى انا فيها دلوقتى
وهى انى مش قادر احل انا مشاكلى لوحدى لا عايز حد ييجى يحليهالى ومش عارف وخايف اواجه
...
...
...
اشكرك يا من عرفته اخيرا اشكرك لانك استاذى لانك فخور بى يكفينى ان تكون انت فخور بى ويشرفنى اشكرك لانك تعلمنى كل يوم مهارة جديدة اشكرك لانك انسان اشكرك لانك تساعدنى على ان اجد نفسى اشكرك لوقتك الثمين الذى تضيعه معى اشكرك يا استاذى فى الحياة
...
...
...
عارفين نفسى فى ايه نفسى اركب العربية واشغل اكتر اغنية باحبها وامشى بالليل الساعة كدة 3 ولا 4 الصبح والشوارع فاضية والدنيا ساقعة وبتمطر وانا باغنى بصوت عالى مع الاغنية واسيب الهوا يخبط فى وشى احساس جميل قوى
...
...
...
الامل انا عايش على الامل ايوة ساعات باحبط وساعات باكتئب بس هو الامل الى مخلينى اعيش
...
...
...
انا كان نفسى اكون حد تانى حد اقوى حد احسن حد واثق من نفسه حد قادر يواجه ويدافع عن حقوقه
...
...
...
الامان كلمة غايبة عن ودانى كلمة مش فاهمها قوى يمكن لانى ما خدتهاش نفسى احس بالامان نفسى استخبى فى حضن ابويا وحضن امى زى ما اكون طفل لسة مولود وباحبى
...
...
...
يا رب انا سايبلك نفسى خالص انت احن حد علية لانك انت اللى خلقتنى وانت الوحيد اللى هتقدر تحافظ علية وتحبنى يا رب اقف جنبى وقوينى يا رب شيل الخوف من قلبى يا رب احمينى انا بحبك قوى يا رب
